Site Feedback

དེ་རིང་དགེ་འདུན་ཆོས་འཕེལ་ཡང་བསྐྱར་དྲན།

ལུགས་མེད་སྲིད་ལ་ངོ་སྲུང་མི་ཤེས་རྣོ་ལྕགས་ངར་མའི་སྒལ་ཚུགས་ཅན། །
བདེན་པའི་གནས་ལུགས་རྡོག་པས་མི་བརྫི་རྒྱུ་འབྲས་ཕྲ་མོའི་རྣམ་གཞག་ཅན། །
གངས་ཅན་ཆོས་སྲིད་གནད་གསང་འཛིན་མཁས་ཤེས་རབ་གསེར་གྱི་ལྡེ་མིག་ཅན། །
རྒྱལ་སྲས་དམ་པའི་དེ་ཉིད་རྫོགས་པའི་དགེ་འདུན་ཆོས་འཕེལ་གང་ན་བཞུགས། །

གསེར་དངུལ་མ་བསགས་སྐྱེས་སྦྱང་རིག་པའི་རྒྱགས་ཕྱེ་ཁུར་ཏེ་ལམ་ལ་བུད། །
འཕྲུལ་ལ་མ་བརྟེན་ཧི་མ་ལ་ཡི་རི་ཕྲེང་རྡོག་པས་འཕྲེད་དུ་བརྒལ། །
རུས་རྐང་མ་བོར་རིགས་ཀྱི་བདེ་སྡུག་སྙིང་ལ་ཉལ་བའི་དྲིན་ལན་དུ། །
སྐུ་ཚེའི་ཡོད་ཚད་ཉེན་ཁར་བསྐྱལ་བའི་དགེ་ཆོས་དྲན་ན་ཕངས་པ་ལ། །

རིག་ལམ་ཚ་མོའི་དབལ་ཁ་མ་བཟོད་འཆལ་བོ་རེད་ཅེས་སྨད་ན་ཡང་། །
ཐབས་འཕྲུལ་དཔལ་ལ་ཕྲག་པ་དོག་སྟེ་བོད་བཙོང་བ་ཞེས་བསྙོན་ན་ཡང་། །
དྲང་ངེས་མ་མཐོང་ལྟ་ལོག་པ་ཞེས་སེམས་ཀྱི་གཏིང་ནས་སྨོད་ན་ཡང་། །
དེ་རིང་བཞུགས་ན་ངོམ་རིན་ཡོད་པའི་བེེཌཱུར་བུམ་བཟང་ཅི་ལ་མིན། །

གངས་ཀྱི་རི་ན་གངས་སེང་དཀོན་ཞེས་སེང་གེ་དཀར་མོའི་ཕྱག་ཆ་ཅན། །
བསྟོད་སྒྲུང་ཡོལ་བས་ལོ་རྒྱུས་སྒྲིབ་ཅེས་གེ་སར་སྐྱེས་བུའི་མི་གཤིས་ཅན། །
འདི་ནས་ལོ་ངོ་དྲུག་ཅུའི་སྔོན་གཤེགས་དུས་རབས་གསར་བའི་བསམ་བློ་ཅན། །
ཨ་མདོའི་གླེན་ཕྲུག་རིག་པའི་དཔའ་བོ་དགེ་འདུན་ཆོས་འཕེལ་དྲན་པ་ལ། །

དགེ་འདུན་ཆོས་འཕེལ་ངེད་གཉིས་ཟེར་ནས་ཆང་ལབ་རྒྱག་མཁན་མང་བའི་ཉིན། །
ང་དང་དགེ་ཆོས་འདི་ནས་མཚུངས་ཞེས་རང་ཐག་གཅོད་མཁན་བདོ་བའི་དུས། །
གསེར་གྱི་ཐང་མའི་ཟུར་དངོས་རེ་དང་ཀླུ་སྒྲུབ་དགོངས་རྒྱན་ཆ་ཤས་རེས། །
གཞལ་བྱའི་ཡུལ་ན་ཁྱེད་འདྲ་ཕར་ཞོག་ཁྱེད་ཀྱི་དྲི་ཙམ་སུ་ལ་བྲོ། །

རང་གིས་རང་ཉིད་ཆེ་སར་འགོད་ཕྱིར་ལོ་རྒྱུས་རྫུན་དང་སྲེ་བའི་དུས། །
ཐོབ་དང་གྲགས་པའི་ཆེད་དུ་དམིགས་ཏེ་མི་བྱེད་སྣ་གཅིག་བྲལ་བའི་སྐབས། །
དབུ་མའི་ལམ་ན་དོན་གྱི་ཕྱུག་པའི་དགེ་འདུན་ཆོས་འཕེལ་ཁྱེད་འདྲ་ལ། །
རིག་པའི་གནས་ཀུན་ཆགས་ཐོགས་བྲལ་ཞེས་འུད་ཀྱིས་བསྟོད་ཀྱང་ཆོག་ཆོག་ཡིན། །

སྲིད་ལ་ཆོས་གནོད་དཔལ་འབྱོར་ལམ་ཁ་འགག་འགྲོ་ཟེར་ནས་འབར་བ་ནས། །
ཆོས་ལ་སྲིད་གནོད་ཐར་བའི་སྲོག་རྩ་དུམ་བུར་ཆད་ཅེས་སྤྱོ་བ་ལས། །
ཐབས་མཁས་སྤྱོད་པའི་ལམ་སྣ་མ་ཟིན་གངས་ཅན་བོད་པ་རྒུད་པའི་དུས། །
ཤན་འབྱེད་ཕྱོགས་སྟོན་སངྒ་དྷརྨ་སྲིད་འདིར་བཞུགས་ན་ཅི་མ་རུང་། །

དགེ་ཆོས་རྣམ་ཐར་ཟུར་དངོས་མཇལ་གྱིན་འགྱོད་པའི་སྙིང་ཆུང་ལྡང་བ་ནས། །
གང་གི་འདྲ་པར་ཧྲལ་ཧྲུལ་མཐོང་ན་ཧུ་ཤུ་ཤོར་བ་རྫུན་གཏམ་མིན། །
སྐྱེས་བུའི་རིན་ཐང་ཤི་རྗེས་མ་གཏོགས་བསོད་ནམས་མིག་གིས་མི་མཐོང་བ། །
གངས་ཅན་བོད་པའི་ལས་དབང་འདི་ལ་བསམ་གྱིན་བསམ་གྱིན་མཆི་མ་འཁྲུག །

Share:

 

2 comments

    Please enter between 0 and 2000 characters.

     

    Corrections

    No corrections have been written yet. Please write a correction!

    Write a correction

    Please enter between 25 and 8000 characters.

     

    More notebook entries written in Tibetan

    Show More