حَارْ أمِيرْ فْأَمْرُو، بِينْ الرّْجُوعْ لِلدُّوَّارْ وْبِينْ يَكَمَّلْ طْرِيقُو لِلْقْصَرْ.. فَكَّرْ مَزْيَانْ وْقَرَّرْ يَكَمَّلْ الْمْسِيرْ. حِيثْ مَاعَنْدُو مَا يَخْسَرْ الْفَقْرْ رَاهْ عَايْشْ فِيهْ، وْالْمُوتْ وَاحْدْ الْيُومْ تْدُقّْ عْلِيهْ. إِيوَا مْلِّي وْصَلْ أَسْيَادِي لْقْصَرْ حَبْسُوهْ الْحُرَّاسْ لِقلَّة شَانُو.. إِيوَا عْلاَّوْ صُوتْهُمْ وْعَلاَّ صُـوتُو، حَتَّى وْصَلْ الصُّوتْ لَلاَّ شَامَة.. طَلاَّتْ عْلِيهُمْ وْقَالَتْ : - خَلِّيوْهْ، وْيْكُونْ آخِرْ ضْيَافِي فْهَادْ اليوم. مْلِّي شاف للاَّ شَامَة تْسَمَّرْ فْمْكَانُو حيت كانت اجمل مما كان يتصور،قال: - إِلَى خَلِّيتِيهَا أَلْفْ نَجْمَة أَنَا قَابْلْ. تْعَجّْبَاتْ لَلاَّ شَامَة لْكْلاَمُو وْقَالَتْ : - ظَنِّيتِي النّْجُومْ سَاهْلَة، مِنْ غِيرْ السّْمَا مَا تْلْقَاهَا عَنْدْ تَاجْرْ وَلاَّ قَافْلَة. خْرَجْ أَمِيرْ مِنْ الْقْصَرْ، وْتْسَنَّى اللِّيلْ يْطِيحْ. إِيوَا غِيرْ ظْلاَمْ الْحَالْ طْلَعْ لْأَعْلَى جْبَلْ فِالْمْدِينَة.. وْبَانْتْ لِيهْ النّْجُومْ فْقَبْضَةْ إِيدِيهْ، وْعْيَا مَا يْنَقَّزْ هْنَا وْهْنَا، أمِيرْ كَانْ كيضن الأَمْرْ سَاهَلْ، يطْلَعْ للْجْبَلْ وْيجِيبْ النَّجْمَة، أَمَّا دَابَا وْللاَّ يْشُوفْ نْجَاتُو نَعْمَة. جْلَسْ حَايِرْ فْأَمْرُو.. آشْ هَادْ الورطة ورطت راسي ، كُونْ أَنَا فْدَارِي طَايْبْ نْعَاسِي. إِيوَا شْوِيَّة، سْمَعْ صُوتْ خَطْوَاتْ قْرِيبَة مْنُّو..